හන්තාන කටුසු කොන්ද ප්‍රදේශයේ අතරමං වූ පුද්ගලයකු බේරා ගනී 

හන්තාන කඳු පන්තියේ "කටුසු කොන්ද" තරණය කිරීමට ගොස් අතුරුදන්ව සිටි පුද්ගලයෙකු බේරාගැනීමට යුද හමුදාව සමත්ව තිබේ. 

අද (13) පෙරවරුවේ සිදු කළ විශේෂ මෙහෙයුමකින් ඔහු බේරගත් බව යුද හමුදාව සඳහන් කළේය. 

මෙම මෙහෙයුම සඳහා යුද හමුදාවේ 111 වන පාබල බලසේනාවට අයත් 2 (ස්වේච්ඡා) ශ්‍රී ලංකා සිංහ රෙජිමේන්තුවේ භට පිරිස්  එක්වූහ.

මහනුවර පොලීසිය වෙතින් ලද තොරතුරකට අනුව ඊයේ (12) පස්වරු 06:40 ට පමණ යුද හමුදා නිලධාරීන් දෙදෙනෙකු සහ සෙබළුන් අට දෙනෙකුගෙන් සමන්විත කණ්ඩායමක් මෙම දුෂ්කර ගලවා ගැනීමේ මෙහෙයුම ආරම්භ කරන ලදී. 

දැඩි අන්ධකාරය හා මීදුම් සහිත පරිසරය මධ්‍යයේ රාත්‍රී කාලය පුරාම සෝදිසි මෙහෙයුම් අඛණ්ඩව සිදු කළ බව යුද හමුදාව සඳහන් කරයි. 

ඒ අනුව, අද (13) පෙරවරු 07:45 ට පමණ අතුරුදන්ව සිටි පුද්ගලයා නිරුපද්‍රිතව සොයා ගැනීමට යුද හමුදා භට පිරිස් සමත් වූහ.